Google саяхан хүний биеийн бүтцийг бүрэн нээж харуулдаг Google Body Browser програмыг нийтэд дэлгэв. Энэ нь Google Earth програмын нэг хэсэг гэнэ.

Гурван хэмжээст, олон давхраат илэрхийллээр эрэгтэй, эмэгтэй хүний биеийг бүрэн нээж харуулдаг энэхүү үзүүлэнг Slim Goodbody -ийн виртуал хувилбар ч гэж хэлж болох юм.

Програм нь WebGL хэмээх платформ хамааралгүй, доод түвшний 3D график API -г ашигласан ба энэ нь HTML5 (www.amarxan.com дээр одоогоор HTML4 -ийн хичээлүүд орсон, орж байгаа ба HTML5 -г одоогоор бүх нийтээрээ хараахан хэрэглэж эхлээгүй байна) -ын Canvas элементийг ашигладаг, өөр Flash, Java гэх мэт нэмэлт плагин шаарддаггүйгээрээ онцлог юм байна.

Хэрэв та WebGL -г дэмждэг броузераар bodybrowser.googlelabs.com гэсэн хаягт орвол хүний биеийн бүтцийг нээн харуулсан энэхүү үзүүлэнг үзэж болно. Одоогоор WebGL -г бүх броузер дэмжихгүй, зөвхөн бэта хувилбартаа байгаа ч Google Chrome, Safari, Firefox зэрэг броузеруудын сүүлийн хувилбар дэмжинэ. (Google Chrome Beta хувилбарыг татаж аваад, Google Body Browser -г туршиж үзнэ үү.)

Ингээд та Body Browser -г нээнгүүт хүний биеийн бүтэц таны өмнө гарч ирэх ба арьс, булчин, судас, яс, дотор эрхтэн гээд олон төрлийн давхраатай, түүнийгээ хааж нээж болдог, мөн эргүүлж тойруулж, томруулж жижигрүүлж болох 3D хэмжээст дүрслэл харагдах болно. Мөн ямар нэг эд, эрхтэн, ясны нэрийг мэддэг бол түүнийгээ бичингүүт шууд тэрхүү эрхтэнг тодруулан харуулна.

Энэ бол нэг талаас шинэ вэб технологийн гайхамшгийг үзүүлсэн загвар боловч нөгөө талаас эрүүл мэндийн салбарынхан, багш, оюутнуудад үзүүлэн болгож ашиглах талаараа ч гайхамшигтай бүтээл болжээ.

Эх сурвалж : http://content.usatoday.com/communities/technologylive/post/2010/12/google-explores-the-human-body-with-html5/1